مانگرتنی خوێندکارانی کورد له هه‌ولێر بۆ عه‌دنان و هیوا، کۆتایی پێهات

مانشێت نیوز، هه‌ولێر: مانگرتنی 3 ڕۆژه‌‌ی خوێندکارانی کورد له هه‌رێمی کوردستان به مه‌به‌ستی پشتیوانی له هه‌ڵوه‌شاندنه‌وه‌ی سزای له‌سێداره‌دانی "هیوا بووتیمار" و "عه‌دنان حه‌سه‌نپوور" و پڕۆتیستۆکردنی ئه‌م کرده‌وه‌ی کۆماری ئیسلامی، پاش ئه‌نجامی ڕێوڕه‌سمێک، له هه‌و‌لێر کۆتایی پێهات.

ئه‌م مانگرتنه که ڕۆژی 4ی ئه‌گۆست و به به‌شداری کۆمه‌ڵێک خوێندکاری پارچه‌کانی تری کوردستان و به هه‌ڵدانی خێوه‌تێک له به‌رده‌رگای سه‌ندیکای ڕۆژنامه‌وانانی کوردستان، به‌ڕێوه‌چوو، پاش 3 ڕۆژ، دوێنێ کۆتایی پێهات.

له‌ ڕێوڕه‌سمی کۆتایی مانگرتنه‌که‌دا که له زۆربه‌ی شاره‌کانی تری هه‌رێمی کوردستان به به‌شداری ده‌یان خوێندکاری کورد، پارجه‌کانی تری کوردستان به‌ڕێوه‌چووبوو، هه‌ر یه‌ک له سه‌رۆکی سه‌ندیکای ڕۆژنامه‌نووسانی کوردستان و به‌رپرسی ماڵپه‌ڕی خۆرهه‌ڵات نیوز و نوێنه‌رانی مانگرتووان، به خوێندنه‌ه‌ی به‌یاننامه‌یه‌ک، سه‌پاندنی سزای له‌سێداره‌دانیان بۆ دوو ڕۆژنامه‌وان و چالاکی مه‌ده‌نی کورد "عه‌دنان حه‌سه‌نپوور و هیوا بووتیمار"، شه‌رمه‌زار کرد و وێڕای پڕۆتیستۆکردنی ئه‌م هه‌وڵه‌ی کۆماری ئیسلامی دژ به ڕۆژنامه‌گه‌ری کوردی، خوازیاری هه‌ڵوه‌شاندنه‌وه‌ی سزاکه و ئازادکردنی بێ مه‌ڕجی گیراوانی کورد بوون.

وێنه: خۆرهه‌ڵات نیوز