پ.ک.ک ده‌ڵێ له تۆڵه‌ی 11 گه‌ریلا کوژراوه‌که‌ 17 عه‌سکه‌رمان کوشتووه!

مانشێت نیوز، به‌هدینان: هێزی پاراستنی گه‌ل، ڕایگه‌یاند که له تۆڵه‌ی 11 گه‌ریلا کوژراوه‌که‌ی هه‌رێمی ئولوده‌ره‌ی شڕناخ که زانرا ته‌رمه‌کانیان پارچه‌ کراون، له گاباری شرناخ و ئیلیچی ئه‌رزه‌نجان، 17 عه‌سکه‌ریان کوشتووه.

ناوه‌ندی ڕاگه‌یاندن و چاپه‌مه‌نی هێزی پاراستنی گه‌ل له به‌هدینان ئاشکرای کرد که ڕۆژی 25ی ئه‌گۆست، له هه‌رێمی ئیلچی سه‌ر به ئه‌رزه‌نجان و ئاوایی عمرانلی سیواس، له لایه‌ن گه‌ریلاکاانی پ.ک.ک‌وه هێرش کراوه‌ته سه‌ر کامیۆنێکی هه‌ڵگری عه‌سکه‌ری تورک و له ئاکام دا 13 عه‌سکه‌ر و کوژراون و 8ی تریش بریندار بوونه.

ڕۆژی پێشووتریش له چیایی گاباریش، هێزه‌کانی یه‌‌ژاستاری سه‌ر به هه‌په‌گه‌، هێرشی کردۆته سه‌ر هه‌ندێک عه‌سکه‌ری تورک له هه‌رێمه‌که و له ئاکام دا 4ی لێ کوشتوون و هه‌ژمارێکی نه‌زانراویشی لێ بریندار کردوون که به هێلیکۆپته‌ر بۆ نه‌خۆشخانه‌کانی عه‌سکه‌ری گوازراونه‌ته‌وه.