عه‌دنان حه‌سه‌نپوور و هیوا بووتیمار کۆتاییان به مانگرتنه‌که‌یان هێناوه

مانشێت نیوز، مه‌ریوان: زانرا که "عه‌دنان حه‌سه‌نپوور" ڕۆژنامه‌وانی کورد و "هیوا بووتیمار" چالاکی مه‌ده‌نی کوردی مه‌حکووم به ئیعدام که 50 رۆژه مانیان له‌خواردن گرتبوو، کۆتایین به مانگرتنه‌که‌یان هێناوه.

خۆرهه‌ڵات نیوز له سنه‌وه‌ ئاشکرای کرد که دایک و باوکی هیوا بووتیمار، سه‌ردانی کوڕه‌که‌یان کردووه و ڕایانگه‌یاندووه که عه‌دنان و هیوا له سه‌ر داخوازی بنه‌ماڵه و ڕێکخراوی هه‌واڵنێرانی بێسنوور، سه‌ره‌ڕای ئه‌وه‌ی که داخوازیه‌کانیان گوێی لێنه‌گیراوه، کۆتاییان به مانگرتن له‌خواردنه‌که‌یان هێناوه.

عه‌دنان حه‌سه‌نپوور و هیوا بووتیمار، رۆژنامه‌نووس و چالاکی ژینگه‌پارێزی کورد، 50 ڕۆژ له‌مه‌وبه‌ر پاش گوازتنه‌وه‌یان بۆ گرتووخانه‌ی ئیتلاعاتی سنه و ئاشکرابوونی سزای له‌سێداره‌دانیان مانیان له‌خواردن گرتبوو و له‌م دوایانه‌ دا ڕه‌وشی ته‌ندریوستیان مه‌ترسیدار بوو و بۆیه‌ش بنه‌ماڵه، چالاکانی مافی مرۆڤ و مه‌ده‌نی، ڕێکخراوی هه‌واڵنێرانی بێسنووریش داوایان له‌م دوو که‌سه کردبوو که کۆتایی به مانگرتنه‌که‌یان بێنن و به‌ڵام به‌رپرسان ته‌نیا له گرتووخانه‌ی ئیتلاعاته‌وه بۆ گرتووخانه‌ی گشتی سنه‌یان گوازتوونه‌ته‌وه، ئه‌گه‌رچی له‌وێش هه‌ر له ژووری تاکه‌که‌سی دان.

پێشتر عه‌دنان و هیوا داوای هه‌ڵوه‌شاندنه‌وه‌ی سزای له‌سێداره‌دان، دیتنی به‌رپرسێکی قه‌زایی و گوازتنه‌وه‌ی خۆیان بۆ گرتووخانه‌ی گشتی کردبوو که ته‌نیا دوایین خواستیان گرینگی پێدراوه.